Willkommen
D’Pfadi Falkastei Landquart isch im Johr 1943 vom Emanuel Stettler v/o Pic gründet worda. In ihrem erschta Johr het Pfadi 22 Mitglieder kha und au scho ihres erschta kantonala Pfingstlager in Chur beschtritta... I könnti jetzt do no vieli Johreszahla und Näma vo füfzig Johr Pfadigschicht erwähna, aber i glauba, dass wär eher langwielig (wenn öpper alli gnaua fakta und zahla ha möchti -> mail an r.april@ilnet.ch ?)
1996 hett d’Pfadi Falkastei wo bisher nur us Buaba beschtanda hett mit dr Mailtlapfadi Marschlins fusioniart. Und sithär hetts unter am gmeinsama Nama Pfadi Falkastei Landquart Buaba und Mailtla drbi. Im Moment sind miar 107 Mitglieder, das heisst Wölfli, Pfadis, Raider, Leiter und Rover zäma.
Jetzt frogen iar eu sicher, was machen dia denn aso? Miar hen vom März bis im Dezember jewiels am Samstig Nommitag mit Pfadis und Wölfli Üabiga. Döt wird so ziemlich alles gmacht: Baschtla, renna, knöpfa, kocha, Musig macha, spiela, klettara, mola und eifach mit anand luschtig ha. ABER ACHTUNG!!!!!! Pfadi isch nüt für heikli Mamis oder empfindlichi Wäschmaschina, will miar sin eigentlich bi jedem Wetter dusa. Für Pfadis gits all Johr as kantonals Pfingschtlager, wo sich alli Pfadis ima Gruppawettkampf messen. In da Summerferia organisiaren miar jedes Johr as So-La (Sommer-Lager). Und für d’Wölfli gits im Herbscht as He-La (Herbst-Lager?).
D’Lager sind sicherlich d’Höhepünkt voma Pfadijohr.
Aber eigentlich chama Pfadi gär nid so recht mit Wörter beschrieba und drum luagend iar am beschta amol üsi Fötali uf dära Sita a. Und falls iar Luscht übercho hen zum amol an a Üabig go luaga cho, tüan eu eifach bi miar melda und scho channs los go ?
Allzeit bereit
Nicolas Rossier v/o Fjord
Abteilungsleiter